နေညိုရောင်တောက်ချိန်

“အိုသွေး… ဘယ်သူ့မှာ အိုသွေးရှိလဲ မသိဘူး…”

ညာလက်သုံးခု ယောင်ယမ်းပြီး ပြိုင်တူထောင်သည်။ တစ်ခုက သူရိန့်လက် ဝဝတုတ်တုတ်… ခိုင်မာပြတ်သားမှုအပြည့်နဲ့။ တစ်ခုက ပိုးဥလက် ဖြူဖြူသွယ်သွယ်လေး… ဇဝေဇဝါနဲ့။ တစ်ခုက သူမလက်… ကတုန်ကယင်နဲ့။

“လူနာအတွက် အရေးပေါ်လိုလို့ လှူနိုင်မလား”

လက်ဝဝတုတ်တုတ်က နေရာကမရွေ့။ လက်ဖြူဖြူသွယ်သွယ်လေးက အောက်နည်းနည်းဆင်းသွားသည်။

“ကျွန်မလှူမယ်…”

အသံတုန်တုန်အဆုံးမှာ လက်တုန်တုန်က အပေါ်ကို ပိုမြင့်သွားသည်။ “ဟဲ့” အာမေဋိတ်သံတိုးတိုးနဲ့ မျက်လုံးကြီးပြူးပြီး လှည့်ကြည့်တဲ့ သူ့ရိန်ကို ပြန်ကြည့်လိုက်ချိန် သူမနှုတ်ခမ်းတို့လည်း တုန်ရင်နေခဲ့ပြီ…

♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦

“နင် ရူးနေလား… နင်ပဲ သွေးဆို ကြောက်လှချည်ရဲ့ဆို”

ဆေးရုံကုတင်ပေါ်မှာ ပိုက်တန်းလန်းနဲ့ ပက်လက်ကလေး မျက်စိပျက်မျက်နှာပျက်ဖြစ်နေတဲ့ သူမကို သူရိန်ဘေးနားက ကြည့်ပြီး ပွစိပွစိပြောသည်။ သူမ ပိုက်ရှိရာဘက်ကို ကြိုးကြိုးစားစား မျက်နှာလွှဲထားရင်း…

“ဟဲ့ အရေးပေါ်လိုနေတာဆိုတော့…” ခါတိုင်းလို အားရှိပါးရှိတောင် ပြန်ရန်မတွေ့နိုင်။ သူမ အသံက ကြောက်စိတ်ကြောင့် တုန်ရင် ဖျော့တော့နေသည်။

“ငါလှူမှာပေါ့ဟ…”
“အိုး... နင်တို့ တခါပြောနေတာ ကြားဖူးတယ်။ နင့်သွေးမှာ ဘာရောဂါပိုးဆိုလည်း ရှိတယ်ဆို? တော်ကြာ မတော်တဆများ… ”
“အာ… အဲဒါ စောလှိုင်တို့ ပေါက်တတ်ကရ နောက်နေတာတွေကို နင့်ဘာသာ နားစွန်နားဖျားကြားတာ။ တကယ်ရှိမှတော့ ဆရာဝန်တွေ နပ်စ်တွေကရော ငါ့သွေးကို ပေးသွင်းမှာ မို့လို့လား။ ဒီလောက်တောင် အဖြစ်သဲနေတာ နင့်ထိုက်နဲ့ နင့်ကံပဲ။ လာကြောက်မပြနဲ့။ မသနားဘူး ဟေ့။”

သူရိန် ခပ်ပြတ်ပြတ်ပြောရင်း လက်ထဲက ပန်းသီးကို ခွပ်ကနဲ ကိုက်စားပစ်သည်။ ပန်းသီးက နီရဲစိုလက်လို့။ သူမ မျက်လုံးကို ယောင်ယမ်းပိတ်လိုက်သည်။ ခုချိန်မှာ သူမ အနီရောင်ဆိုလို့ ဘာကိုမှ မမြင်ရဲ…

♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦ ♦

သူရိန်အခန်းတံခါးကို ခပ်ဖွဖွပိတ်လိုက်ချိန်မှာ သူ့မျက်လုံးတို့ ခပ်လေးလေးပွင့်လာသည်။ ပိုးဥကို ရီဝေစွာ ကြည့်သည်။ နောက် သူရိန့်ကို လှမ်းကြည့်သည်။ နောက်တော့ သူမရှိရာ မျက်လုံးတွေ ရောက်လာပြီး…

“ကျေးဇူး ထိုက်…”

ခြောက်သွေ့နေတဲ့ နှုတ်ခမ်းတို့ကနေ ခပ်တိုးတိုးပြောတော့ သူမ ရင်ထဲမှာ လေးလံထိခိုက်ရသည်။ သူမ ခေါင်းငြိမ့် ပြလိုက်သည်။ သူမနဲ့ သူရိန်က ခုံတန်းရှည်ပေါ် ထိုင်ချလိုက်တော့ ပိုးဥက သူ့ဘေးမှာထိုင်ရင်း လက်တစ်ဖက်ကို ခပ်ဖွဖွ ဆုပ်ကိုင်သည်။ နောက် ပေါ့ပေါ့ပါးပါးလေး ပြုံးပြသည်။ ပိုးဥက သူ့ရည်းစားအသစ်စက်စက်လေး။ သူတို့ ကြိုက်တာ ရက်ပိုင်းလောက်ပဲ ရှိဦးမည်။ သူ့ကောင်မလေးတွေ အားလုံးက တပုံစံထဲလေးတွေပါပဲ။ မျက်လုံးဝိုင်းဝိုင်း ဖြူဖြူသွယ်သွယ်နဲ့ မျက်နှာပေါက် မျက်နှာကျ ကလေးတွေ တူသလို အရာရာကို ပေါ့ပေါ့လေး ရှုမြင်တတ်ကြပုံခြင်းလည်း တူသည်။ အင်းလေ… ဘဝရဲ့ တခြားအရာတွေကိုတော့ မသိ… သူနဲ့ရည်းစားဘဝကိုတော့ ပေါ့ပေါ့လေးတွေသာ သဘောထားကြပုံ ရသည်။ ပြတ်သွားတိုင်း ဟန်မပျက်။ သူနဲ့ အခေါ်အပြောလည်း မပျက်။

“နင် အဲလိုပုံစံဆင်တူလေးတွေ တစ်ယောက်ပြီးတစ်ယောက် ပြောင်းနေမယ့်အစား တစ်ယောက်ထဲကိုပဲ တည်တည်ငြိမ်ငြိမ် တွဲပါလား…” လို့ သူမ တစ်ခါပြောတုန်းက သူ အလေးမထားသလို ရယ်လို့သာနေခဲ့သည်။

ပိုးဥပြောသမျှ ချစ်စရာစကားလေးတွေကို ပြုံးပြီးနားထောင်နေတဲ့ သူ့မျက်လုံးတွေက နွမ်းလျလွန်းနေသည်။ သူ့ကို ဒီလိုပုံစံနဲ့ တခါမှ မမြင်ဖူးခဲ့။ သူသည် အခါခပ်သိမ်း တက်ကြွဖြတ်လတ်လွန်းသူ ဖြစ်သည်။ ကျောင်းတုန်းကလည်း စာမညံ့သလို Basketball မှာလည်း ထူးချွန်လိုက်သေးသည်။ ဒါပေမယ့် သူတို့ အုပ်စုထဲမှာ ဆေးလိပ်စသောက်တတ်တာလည်း သူပဲဖြစ်နေပြန်သည်။ အရက်အကြောင်း သူစပြောပြတုန်းကလည်း သူရိန်တို့မှာ ပါးစပ်အဟောင်းသားနဲ့ နားထောင်ခဲ့ရသတဲ့။ အဲဒီလိုပါပဲ… သူတို့ အုပ်စုထဲမှာ မကောင်းမှု ဟူသမျှ အရင်ဆုံး လက်တည့်စမ်းဖူးသူမှာ သူသာ ဖြစ်ခဲ့သည်။ အဆိုးဆုံးက သူဟာ မကောင်းမှုတွေထဲမှာ နစ်မြုပ်မသွားအောင် သူ့ကိုယ်သူ ထိန်းနိုင်တယ်လို့ ယုံကြည်မှုလွန်ကဲနေခြင်း။ ဒီလိုနဲ့ သူသည် လူတော်ဖြစ်လာတော့ မယောင်ယောင်နဲ့ လူဆိုးဆန်ဆန် ကြီးပြင်းလာခဲ့သည်။

“နင့်ပြဿနာက ကိုယ့်ဘာသာ ယုံကြည်မှုလွန်ကဲနေတာ” သူမ တခါတုန်းက သူ့ကို ဝေဖန်ဖူးသည်။
“အဲဒါ ဘယ်သူ့ကို ထိခိုက်နေလို့လဲ…” ခပ်ဆတ်ဆတ်ပြန်ဖြေတဲ့ သူ့အဖြေကို “နင်နဲ့ဘာဆိုင်လို့လဲ” ရယ်လို့ တိုက်ရိုက်ဘာသာပြန်ရင်း သူမဆွံ့အဝမ်းနည်းစွာ ထိုနေ့က အိမ်ပြန်ခဲ့သည်။ တကယ်တော့ သူမ ပြန်ပြောခဲ့ဖို့ကောင်းသည်… “နင့်ကို…” လို့။

သူ သူမကို အခါခါ နာကျင်အောင် လုပ်ဖူးပါသည်။ ဒါပေမယ့် သူမ စိတ်ကသာနာသည်။ နှလုံးသားက နာရကောင်းမှန်းပင် မသိခဲ့။

အတွေးထဲနစ်မြောနေတုန်း ပိုးဥပြန်ဖို့ ပြင်နေတာ မြင်လိုက်ရသည်။ သူရိန်က နယ်ကလာတဲ့ သူ့မိဘတွေမရောက်ခင်အထိ ညအိပ်စောင့်ပေးမယ်လို့ ပိုးဥကို လှမ်းပြောနေသည်။ ပိုးဥ သူမကို တချက်ပြုံးပြပြီး ထွက်သွားတော့ သူမလည်း ပြန်ဖို့ သတိရသည်။ သူ့ကို ငဲ့ကြည့်တော့ အိပ်ယာပေါ်ကနေ သူမကို ငေးကြည့်နေသည်။

“ငါပြန်တော့မယ်…” သူခေါင်းငြိမ့်ပြသည်။
“သူရိန် ငါ့ကို ဘတ်စ်ကားဂိတ်ရှိတဲ့ဘက် ပြန်လိုက်ပို့ပေးပါလားဟာ။ ငါအလာတုန်းက လမ်းမှတ်မထားလိုက်မိလို့”
“အေးပါ ပို့မှာ။ နင်မမှတ်မိမှာ ငါသိတယ်။ မှတ်မိရင်လည်း အံ့ဘွယ်ဖြစ်မှာ။ အလာတုန်းက ဒီလောက် ပျာယာခတ်နေတာ…”

သူမ ရှက်သလိုဖြစ်သွားပြီး လက်က တိတ်ပြားနဲ့ကပ်ထားတဲ့ အပ်ရာကို ယောင်ယမ်းဆုပ်ကိုင်မိတော့ နာကျင်မှုကြောင့် တွန့်ကနဲ ဖြစ်သွားသည်။ မျက်လုံးထောင့်မှာ သူလှမ်းငေးနေတာကို မြင်နေရသည်။

“ခဏ… ငါ အိမ်သာ ဝင်လိုက်ဦးမယ်”

သူရိန် အခန်းနဲ့တွဲထားတဲ့ အိမ်သာထဲ ဝင်သွားတော့ သူမ နဲ့ သူ အခန်းထဲမှာ တိတ်ဆိတ်မှုနဲ့ အတူကျန်ခဲ့သည်။ သူ့ကို ငဲ့ကြည့်တော့ သူမကို ငေးနေဆဲ။ စကားလည်း မပြော။ သူ နေရထိုင်ရတာ သက်မှ သက်သာရဲ့လား။ တိတ်ဆိတ်လွန်းတာကြောင့် သူမ နေရခက်လာတော့ စကားစမိသည်…

“နေရတာ သက်သာလား…”

သူ ခေါင်းငြိမ့်ပြသည်။ သူမစိတ်ထဲမှာ သူရိန် အိမ်သာဝင်တာ ကြာလွန်းလှသည်။

“နင် သွေးကြောက်တတ်တယ် မဟုတ်လား…”
“အင်း… ဟင်… နင်ဘယ်လိုလုပ်သိလဲ…”
“သိတာပေါ့…”

ဒဏ်ရာကြောင့်လား မသိ။ သူ့မျက်နှာမှာ ခံစားချက်တို့ ကင်းမဲ့နေသလိုလို…

“နောက်ကို ဆိုင်ကယ်မစီးပါနဲ့တော့လားဟာ…” သူက ကြားဟန်မတူ…
“ငါလေ… ဒဏ်ရာကြောင့်လားတော့ မသိဘူး။ စိတ်ထဲမှာ တမျိုးကြီး ဖြစ်နေတယ်… အေးနေသလိုလို လေးနေသလိုလို။ ကြည့်ရတာ နင့်သွေးတွေ ငါ့ကိုယ်ထဲမှာ စီးနေလို့လားမသိဘူး။”

သူ ယဲ့ယဲ့ပြုံးရင်းပြောတော့ သူမ ရင်တလှိုက်လှိုက်ခုန်လာသည်။ တညနေလုံး သူခုမှ စကားတွေ အများကြီး စပြောသည်။ သက်သာလာပြီ ထင်ပါရဲ့။ သူ့မျက်လုံးတွေကို ကြည့်လိုက်တော့ အပြင်ဘက်က လိမ္မော်ရောင် ကျနေကြောင့် အညိုရောင်ကနေ ပျားရည်ရောင်လိုလို ရွှေအိုရောင်လိုလိုလေး ဖြစ်နေသည်။ သူမ သတိလက်လွတ် ငေးနေမိတုန်း သူဆက်ပြောသည်…

“နင့်ကိုလည်း ရုတ်တရက်ကြီး ပိုနားလည်လာသလိုပဲ”

အို ဘာကိုများ နားလည်သွားတာလဲ။ သူမ မျက်နှာပူကနဲ ဖြစ်သွားချိန်မှာပဲ သူရိန်ထွက်လာသည်။

“ကဲ သွားကြမယ်…။ လူနာရေ… ငါ မင်းကျေးဇူးရှင်ကို ဘတ်စ်ကားဂိတ် ခဏ လိုက်ပို့လိုက်ဦးမယ်။” ပြောင်ချော်ချော်ပြောရင်း သူရိန် ရှေ့ကနေ အခန်းပြင်ကို တလိမ့်လိမ့် ထွက်သွားသည်။ သူမ သူ့ကို ပြုံးပြလိုက်တော့ သူ နူးညံ့သော မျက်လုံးတွေနဲ့ သူမကို ငေးကြည့်နေဆဲ။

“ငါ့မှာ အရှင်လတ်လတ် ကိုရီးယားကားထဲများ ရောက်သွားသလားလို့”

တံခါးအပြင်ဘက်ရောက်တော့ သူရိန်က ရွဲ့ပြောပြောသည်။

“ဘာလဲဟ…”
“ငါ အထဲကနေ အကုန်ကြားတယ်…”
“အာ… ဘာကြားတာလဲ။ ငါတို့ ဘာမှ ထူးထူးခြားခြား မပြောဘူး…” ပြောသာ ပြောလိုက်ရပေမယ့် သူမ မျက်နှာတွေ ပူလာပြန်သည်။ သူရိန်က ခေါင်းတငြိမ့်ငြိမ့်လုပ်ပြီး…

“ဟုတ်ပါပြီ ဟုတ်ပါပြီ…”

နောက်ဘာမှ ဆက်မပြောတော့ဖြစ်ဘဲ အသံတိတ် လျှောက်လာမိကြသည်။ ဘတ်စ်ကားဂိတ်ကို လှမ်းမြင်ရတဲ့ နေရာရောက်လာတော့ သူရိန် ရုတ်တရက် လမ်းလျှောက်တာ ရပ်လိုက်သည်။

“ကဲ… ထိုက်… ငါအတည်ပြောမယ်။ နင်ရှေ့ဆက်တိုးမယ်ဆိုရင်တော့ အများကြီး ပြင်ဆင်ထားရလိမ့်မယ်။”

မော့ကြည့်လိုက်တော့ သူရိန့်မျက်နှာက မြင်ရခဲတဲ့ တကယ်ကို အတည်ပြောနေတဲ့ပုံ။

“ဘာလဲ… ဘာကိုလဲ…”
“အမယ် နင်က ငါ့ကို ငတုံးထင်လို့လား…။ ငါမြင်သားပဲ ဟိုကောင်နင့်ကို ကြည့်တဲ့ မျက်လုံးက ကာလာတွေ ပြောင်းနေတာ။”

သူမ ရင်တွေ ကျင်ကနဲဖြစ်သွားသည်။ သူမ ခေါင်းကို တချက်ခါပြီး အားယူပြောလိုက်သည်…

“သူရိန်ရယ်… သူ့မျက်လုံး ကာလာတွေ ပြောင်းတာ ဒါပထမဆုံးအကြိမ် မဟုတ်ပါဘူး…။ နင်စောစောက ပြောတဲ့စကားကို ဘယ်တုန်းကမှ မပြောဖူးဘူးလို့ပဲ ထားလိုက်ရအောင်ဟာ…နော်…”

သူရိန် သူမကို ကြည့်ရင်း တခုခုကို နားလည်သွားသလို ခေါင်းငြိမ့်သည်…

“ကဲ ကဲ… သွားတော့။ နင်လည်း ပင်ပန်းနေပြီ။ ဟိုးမှာလာနေတာ နင်စီးမယ့် ကားထင်တယ်။”

သူမ သူရိန်ကို ကျောခိုင်းထွက်လာတော့ ရင်ထဲက တင်းကျပ်မှု ပိုဆိုးလာသည်။ သူမကို ကြည့်တဲ့ သူ့မျက်လုံးအရောင်ဟာ သူ ရည်းစားလေးတွေနဲ့ ပြတ်လေတိုင်း အခုလို ပြောင်းလဲလေ့ရှိစမြဲ။ ဒီလိုနဲ့ အသစ်တွေ့သွားလေတိုင်း ဖျတ်ကနဲ ပျောက်သွားတတ်ပြန်တာလဲ အကြိမ်ကြိမ်ပါပဲ။ သူမ အကြိမ်ကြိမ် ကြည်နူးခဲ့ဖူးပါသည်။ အဲဒီ ကြည်နူးမှုကြောင့်ပဲ သူ့ထက် အဆပေါင်းများစွာ ပိုကဲတဲ့ နာကျင်မှုတွေလည်း အကြိမ်ကြိမ် ခံစားခဲ့ရဖူးပါပြီလေ...

သူရိန်တို့ ရိပ်မိသလိုပဲ သူမ သူ့ကို ချစ်ပါသည်။ ဒါပေမယ့် အပြင်ပန်းမှာ မာကျောခိုင်မာသယောင်နဲ့ အတွယ်အတာ လွယ်လွန်းတဲ့၊ အလွယ်တကူ ပြောင်းလဲလွယ်လွန်းတဲ့ သူ့ရဲ့စိတ် အကြောင်း… နောက် တခြားတခြားသော သူ့အကြောင်းတွေကို သူများတွေထက်ပိုပြီး သူမ မသိခဲ့ရင် ဘယ်လောက်များ ကောင်းလိုက်မလဲ။ အခုတော့…

သူရိန်ပြောတဲ့ ဘတ်စ်ကားက မှားနေသည်။ သူမ စီးမည့်ကားက မလာသေး။ လည်ကိုဆန့်ပြီး ဇတ်ကနဲ မျှော်အကြည့်မှာ သွေးထုတ်ယူထားတဲ့ဒဏ်ကြောင့် သူမ မျက်လုံးတွေပြာပြီး မိုက်ကနဲ တချက်ဖြစ်သွားသည်။ နီးရာခုံပေါ် ထိုင်ချလိုက်ရင်း မျက်လုံးတွေကို ဖြေးဖြေး ဖွင့်မိတော့ လိမ္မော်ရောင် ညနေခင်းနေရောင်ထဲမှာ သူ့ရွှေအိုရောင် မျက်လုံးလေးတွေကို မြင်ယောင်သည်။ “နင့်ကိုလည်း ရုတ်တရက်ကြီး ပိုနားလည်လာသလိုပဲ” ဆိုတဲ့ သူ့စကားကို ကြားယောင်သည်။ သူမ ယောင်ယမ်းလို့တောင် ပြုံးပြလိုက်မိသေးသည် ထင်ပါရဲ့…

သူမ သူ့ကို ချစ်ပါသည်။ ဒါပေမယ့် ကြိုက်တော့ မကြိုက်ခဲ့။ အဲဒီနှစ်ချက်မှာ ဘယ်တစ်ခုကိုများ သူ… နားလည်ခဲ့ပါလိမ့်ကွယ်…

ရွှေပြည်သူ
(11:20 PM ~ 21-Mar-2011)