Tuesday, January 4, 2011

ဖယောင်းတိုင်လေး သုံးတိုင်နဲ့ မွေးနေ့


အမြဲတမ်း နုပျိုချင်ပေမယ့်လည်း မရ၊ မအိုချင်ပေမယ့်လည်း မရနဲ့ အသက် ၃၀ ကတော့ ပြည့်သွားခဲ့ပါပြီး) ဒီတစ်ခါမွေးနေ့ကတော့ သူငယ်ချင်းတွေ နောက်သလို ထူးထူးခြားခြား “ထိပ်စီးပြောင်းသွား” တဲ့ နှစ်ပါပဲ။ အရင်နှစ်တွေကထက် အသက်အများကြီး ပိုကြီးသွားတယ်လို့ ခံစားရသလို အရင်နှစ်တွေကထက် အရာရာကို ပိုပြီး လေးလေးနက်နက် တွေးမိလာပါတယ်။

လူ့သက်တမ်းက ၆၀ ဆိုရင် တဝက်တိတိကျိုးသွားပြီလို့ ဆိုလို့ရသလို လူလတ်ပိုင်းကို Officially ဝင်သွားတဲ့ ဒီအသက်အပိုင်းအခြားမှာ လူတော်တော်များများ ကိုယ့်ဘဝကိုယ်ကို မကျေမနပ်စိတ်နဲ့ စိတ်ဓာတ်ကျတတ်ကြတယ်လို့ စာတွေထဲမှာ ဖတ်ရပါတယ်။ ကျွန်မကရော…?


အခုနေ ပြန်ဆန်းစစ်ကြည့်တော့ လွန်ခဲ့တဲ့ နှစ်တွေနဲ့ ကွာခြားမှုမှာ အထင်ရှားဆုံးက ခန္ဓာကိုယ်ကြီးပါပဲ။ ၂၀ ကျော်တုန်းက ယောင်လို့တောင် မတွေးမိခဲ့တဲ့ “ကျန်းမာအောင် နေမှ” ဆိုတာမျိုးတွေ အခါမလပ် တွေးမိလာသလို လွန်ခဲ့တဲ့ သုံး/လေးနှစ်လောက်က လိုမျိုးတောင် ညဘက်အိပ်ရေးပျက်တာတွေ မခံနိုင်တော့တာ သတိထားမိလာပါတယ်။ (ကျွန်မကိုက ချူချာတဲ့ ပျော့ဖတ်ဖတ်မို့ သူများတွေထက် ပိုဆိုးနေတာလည်း ဖြစ်နိုင်ပါတယ်။) တကယ်တမ်း ကျတော့လည်း အသက် ၃၀ ဆိုတဲ့ သတ်မှတ်ချက်ကြောင့်သာ သတိထားမိကြည့်လို့ပါ။ တကယ်တော့ ဒီကိုယ်ခန္ဓာကြီးက အချိန်နဲ့အမျှ အိုမင်းဆုတ်ယုတ်နေတာပဲလေ နော်…

နောက်တစ်ခုက လုပ်ငန်းခွင်က ကိုယ့်အနေအထားပါ။ ကျွန်မငယ်ငယ်က မျှော်လင့်ခဲ့တဲ့ “ငါ အသက်၃၀ လောက်ကျရင်…” ဆိုတဲ့ မျှော်လင့်ချက်ဟာ အခုတကယ်ရောက်နေတဲ့ နေရာနဲ့ အလှမ်းကွာဝေးလွန်းလှပါတယ်။ ဒါကိုတွေးပြီး ဝမ်းနည်းချင်သလို ဖြစ်ပေမယ့် ဒီအသက်အရွယ်ရဲ့ ကျေနပ်စရာ အချက်တွေကလည်း အများကြီးပါလို့ တွေးမိပြန်ပါတယ်။

အဓိကအချက်ကတော့ ဒီအရွယ်မှာ ငယ်ငယ်တုန်းကထက် ကိုယ်ဟာ “ဘယ်သူလဲ” ဆိုတာ ပိုသိလာပါတယ်။ ကိုယ့်အားနည်းချက်၊ ကိုယ့်အားသာချက်၊ ကိုယ့်ဝါသနာ၊ ကိုယ်ဘာလိုချင်တာ၊ ကိုယ်ဘာဖြစ်ချင်တာ၊ ကိုယ်ဘာကို လက်မခံနိုင်တာ… စတဲ့ ကိုယ့်အကြောင်းကိုယ် ကောင်းကောင်းကြီး ပိုနောကျေလာပါတယ်။ ကိုယ့်ကောင်းကွက် ဆိုးကွက်ကို သိလာသလို အသက်အရွယ်နဲ့ ဖြတ်သန်းမှုအရ အလိုအလျှောက်ရလာတဲ့ ရင့်ကျက်မှုတချို့ကလည်း ကိုယ့်ကိုယ်ကို ထိန်းကျောင်းပဲ့ပြင်တဲ့ နေရာမှာ ပိုပြီးလွယ်ကူလာစေပါတယ်။

အဲဒါတွေကြောင့် အသက် ၃၀ ဖြစ်ရတာကို အရွယ်နဲ့ ဖြတ်သန်းမှုကပေးတဲ့ တည်ငြိမ်မှုတစ်ခုကြောင့် အသက် ၂၀ ဖြစ်ခဲ့ရတုန်းထက်တောင် ပိုကြိုက်တယ်လို့ ပြောရမှာပါပဲး)

ကျွန်မရဲ့ အသက်(၃၀)မြောက် မွေးနေ့ကလည်း ဘဝမှာ ခုချိန်ထိ ဖြတ်သန်းဖူးသမျှထဲမှာ ကျေနပ်စရာ အကောင်းဆုံးမွေးနေ့ ဖြစ်ခဲ့ပါတယ်။ မွေးနေ့ဖြစ်တဲ့ ဇန်နဝါရီ ၂ ရက်နေ့ တစ်နေ့လုံး ယောဂီဝတ်နဲ့ နေဖြစ်ခဲ့ပြီး ဆရာတော်ကိုလည်း သင်္ကန်း၊ ထီး၊ ဖိနပ်၊ ယပ် နဲ့ အနေကထိုင် တစ်စုံ လှူဒါန်းဖြစ်ခဲ့ပါတယ် (သာဓုခေါ်လိုသူ မောင်နှမတွေကိုလည်း အမျှပေးဝေပါတယ်နော်း)

၁ ရက်နေ့ ည ၁၂ နာရီကျော်ကတည်းက Facebook၊ ဖုန်း နဲ့ Email တွေကနေ ဝင်လာတဲ့ မွေးနေ့ဆုတောင်းတွေ အားလုံးကို ၃ ရက်နေ့မှ တပေါင်းတစည်းထဲ သေချာပြန်စစ်ကြည့်တဲ့ အခါမှာ တကယ်ကို ဝမ်းသာကြည်နူးရပါတယ်။ မူလတန်း ကတည်းက သိခဲ့တဲ့ သူငယ်ချင်းကအစ လွန်ခဲ့တဲ့ ရက်သတ္တပတ် အနည်းငယ်ကမှ ခင်ရတဲ့ သူငယ်ချင်းအဆုံး မွေးနေ့အတွက် ဆုတောင်းပေးထားကြလို့ပါ။ အပြင်လောကမှာ ခင်ရတဲ့ သူငယ်ချင်းတွေ နဲ့ Blog မောင်နှမတွေ၊ စာဖတ်ပေးသူတွေရဲ့ ဆုတောင်းစုစုပေါင်း ၁၀၈ ခု (အခု ကောမန့်က ဆုတောင်းတွေနဲ့ပေါင်းရင် ၁၂၅ ခု ဖြစ်သွားပါပြီး)) ရခဲ့ပါတယ်။ ကျွန်မအတွက် တစ်ခါမှ အဲဒီလောက်များတဲ့ မွေးနေ့ဆုတောင်းတွေ မရခဲ့ဖူးလို့ တကယ်ကို ဝမ်းသာမိပါတယ်။ တချိန်ထဲမှာပဲ ကျွန်မကို ချစ်သူခင်သူတွေ အများကြီး ရှိနေပါသေးလားလို့ နွေးနွေးထွေးထွေး ခံစားရပါတယ်။

ကျွန်မ မွေးနေ့မတိုင်ခင် အစောကြီးကတည်းက သတိတရ ရှိခဲ့ကြတဲ့ ကိုစူပါ (Su Per)၊ မောင်လေး ပေတူး (ဆရာမကြီး ကြည်အေးရဲ့ ကဗျာစာအုပ်ကို တွေ့တဲ့နေရာမှာတောင်းဖို့ မှတ်ထားလိုက်ပြီနော်း)၊ ညီမလေး စိုးယု နဲ့ မွေးနေ့မှာ Blog ကနေ အစောကြီး ဆုတောင်းပေးခဲ့ကြတဲ့ ညီမလေး Green Girl (လွမ်းသုရင်)ညီမလေး ရွှန်းမီမမပန်းချီ (မိုးပန်းချီ)ညီမလေး လွတ်ငြိမ်းလေပြေ၊ Facebook မှာ ဆုတောင်းပေးခဲ့ကြတဲ့ ကို Republic၊ ကိုအောင်မျိုးကျော်၊ ညီမလေး Rainy Zin၊ ညီမလေး မှူးဒါရီ၊ မောင်လေး ထက်မြတ်ကျော်၊ အစ်မ အေးအေးစိုး၊ မမနေကြည်ဝင်း၊ မောင်လေး ဖိုးသင်္ကြန်၊ ညီမငယ်လေး မေဇင် (နောင့်)၊ အစ်မ သက်ဝေ၊ မအိအိရွှေ၊ မောင်လေး အိမ်မြတ်နိုးထွန်း၊ ကိုသီဟသစ်ကြီးကိုဂျူလိုင်၊ မောင်လေး Jackson Bate၊ မမ မေသန့်ခိုင်၊ ကို Alexandria Sykes၊ မောင်ငယ်လေး အောင်ဦး (Auto Birthday Reminder နဲ့ လုပ်တာဖြစ်ပေမယ့် သူကိုယ်တိုင် Wish လုပ်တယ်လို့ပဲ သဘောထားလိုက်ပါတယ်း) ညီမလေး ဝိုင်းအုံချစ်၊ ကိုနေလင်းချမ်း၊ အနော်လေး၊ မလွင်လွင်သိန်း၊ ညီမလေး သင်းစုမွန်ဦး၊ မမချစ်ကြည်အေး၊ ညီမလေး နှင်းပွင့်၊ အစ်ကို လင်းဒီပ၊ ကိုစိုင်းမောင်မောင်သော်၊ ကိုမင်းချမ်း၊ မောင်လေး BlackDream (မှတ်မှတ်ရရ မနှစ်ကလည်း သူကနောက်ဆုံးပါပဲ။း)… တို့ အားလုံးကို အရမ်းကျေးဇူးတင်ကြောင်း ထပ်ပြောချင်ပါတယ်။

ဒီနှစ်တော့ မွေးနေ့ကိတ်မပါတဲ့ မွေးနေ့ပဲလို့ တွေးနေတုန်း အခန်းတံခါးခေါက်ပြီး မွေးနေ့ကိတ်လေးနဲ့ ရောက်လာခဲ့ကြတဲ့ ကျွန်မရဲ့ အခန်းဖော်လေးနဲ့ ချစ်သူငယ်ချင်း TJ တို့ကိုလည်း အရမ်း ကျေးဇူးတင်မိပါတယ်။ (အပေါ်ကပုံက အဲဒီကိတ်မုန့်လေးက ကျွန်မဝေစုလေးပါ။ အားလုံးကိုလည်း အဲဒါလေးနဲ့ ဧည့်ခံပါတယ်နော်း)

ဘဝရဲ့ မှတ်တိုင်သတ်မှတ်ချက်ထဲက တစ်ခုဖြစ်တဲ့ အသက်(၃၀)ပြည့်မွေးနေ့ကို အေးအေးချမ်းချမ်း ပျော်ပျော်ရွှင်ရွှင် ဖြတ်သန်းခွင့်ပေးခဲ့တဲ့ သူငယ်ချင်း ညီအစ်ကို မောင်နှမတွေ အားလုံးကို အထူးကျေးဇူးတင်ကြောင်းပြောရင်း အားလုံးအတွက် ပျော်ရွှင်ချမ်းမြေ့တဲ့ ၂၀၁၁ ဖြစ်ပါစေလို့ ဆုတောင်းပေးလိုက်ပါတယ်ရှင်…

မေတ္တာဖြင့်
ရွှေပြည်သူ


အပေါ်က ဓာတ်ပုံလေးတင်ခါနီး အခန်းဖော်ကို လှည့်ပြီး မေးရပါသေးတယ်… “ဒီလို အပြာရောင်လေး ကွပ်ထားတာ သိပ်များ အရောင်တောက်ပြီး ကလေးဆန်နေလားဟေ” လို့… သူက အားပေးလို့ တင်လိုက်ပါတယ်။ ပြောင်းသွားတဲ့ထိပ်စီးလေးက ကျွန်မကို လွှမ်းမိုးလိုက်ပုံများ… အဲဒီလို အဲဒီလို…း)

0 comments:

Post a Comment

စကားလုံးတိုင်းအတွက် ကျေးဇူးတင်ပါတယ်ရှင်း)